ยตฺถ จีวราสา, ตํ ฐานํ อธิกรณูปจาเรน ‘‘จีวราสา’’ตฺเวว วุจฺจตีติ กตฺวา ‘‘ตํ จีวราสํ ปยิรุปาสตี’’ติอาทิ วุตฺตํ, ตสฺมา อนาสาย ลภตีติ อนาสายิตฏฺฐาเน ลภตีติอาทินา อตฺโถ คเหตพฺโพฯ เอตฺถ นิฏฺฐานสนฺนิฏฺฐานนาสนอาสาวจฺเฉทิกวเสน เอโก วาโรติ อิทเมกํ จตุกฺกํ ชาตํ, ตสฺมา ปุพฺเพ วุตฺตานิ ตีณิ ติกานิ อาสาวจฺเฉทิกาธิกานิ ตีณิ จตุกฺกานีติ เอกํ อนาสายทฺวาทสกนฺติ เวทิตพฺพํฯ ตทนนฺตเร อาสายทฺวาทสเก กิญฺจาปิ ปฐมทฺวาทสกฺกโม ลพฺภติ, ตถาปิ ตํ นิพฺพิเสสนฺติ ตเมกํ ทฺวาทสกํ อวุตฺตสิทฺธํ กตฺวา วิเสสโต ทสฺเสตุํ อาทิโต ปฏฺฐาย ‘‘อนฺโตสีมาย ปจฺเจสฺส’’นฺติ วุตฺตํ, ตํ ทุติยจตุกฺเก ‘‘โส พหิสีมคโต สุณาตี’’ติอาทิวจนสฺส ตติยจตุกฺเก สวนนฺติกาทีนญฺจ โอกาสกรณตฺถนฺติ เวทิตพฺพํฯ อิทํ ปน ทฺวาทสกํ อนาสาย วเสน ลพฺภมานมฺปิ อิมินา อวุตฺตสิทฺธํ กตฺวา น ทสฺสิตนฺติ เวทิตพฺพํฯ เอวเมตฺถ ทฺเว ทฺวาทสกานิ อุทฺธริตานิฯ กรณียทฺวาทสเกปิ ยถาทสฺสิตอนาสายทฺวาทสกํ, อวุตฺตสิทฺธํ อาสายทฺวาทสกญฺจาติ ทฺเว ทฺวาทสกานิ อุทฺธริตพฺพานิฯ อิทานิ ทิสํคมิกนวกํ โหติฯ ตตฺถ ยสฺมา ‘‘ทิสํคมิโก ปกฺกมตี’’ติ วจเนเนว ‘‘น ปจฺเจสฺส’’นฺติ อิทํ อวุตฺตสิทฺธเมว, ตสฺมา ตํ น วุตฺตํฯ เอตฺตาวตา อาวาสปลิโพธาภาโว ทสฺสิโตฯ

[321] ‘‘จีวรปฏิวีสํ อปวิลายมาโน’’ติ อิมินา จีวรปลิโพธสมงฺคิตมสฺส ทสฺเสติฯ ปฏิวีโสติ อตฺตโน ปตฺตพฺโพ จีวรภาโคฯ อปวิลายมาโนติ อากงฺขมาโนฯ ตสฺส จีวรลาเภ สติ วสฺสํวุตฺถาวาเส นิฏฺฐานสนฺนิฏฺฐานนาสนนฺติกานํ วเสน เอกํ ติกํ, เตสํเยว วเสน อนฺตรามคฺเค เอกํ, คตฏฺฐาเน เอกนฺติ ติณฺณํ ติกานํ วเสน เอกํ นวกํ เวทิตพฺพํฯ ตโต ปรํ นิฏฺฐานสนฺนิฏฺฐานนาสนนฺติ กสีมาติกฺกนฺติกสอุพฺภารานํ วเสน ผาสุวิหารปญฺจกํ วุตฺตํฯ อุภยตฺถ เสสกถินุทฺธาราสมฺภโว ปากโฏวฯ อยํ ปเนตฺถ ปญฺจเก วิเสโส – สมาทายวาโร น สมฺภวติ ‘‘ปจฺเจสฺส’’นฺติ ปจฺจาคมนาธิปฺปายโตฯ

[325] ทฺเวเม ภิกฺขเว กถินสฺส ปลิโพธาติ กถินตฺถารสฺส อนุปพนฺธนปจฺจยาติฯ

กถินกฺขนฺธกวณฺณนา นิฏฺฐิตาฯ

8. จีวรกฺขนฺธกวณฺณนา

ชีวกวตฺถุกถาวณฺณนา

[326] ราชคหโกติ ราชคหวาสีฯ

[328] อโมหชาติกตฺตา น จิรสฺเสว วิญฺญุตํ ปาปุณิฯ อหํ เต ปิตา, เกนฏฺเฐน? ยสฺมา ตฺวํ มยา โปสาปิโตฯ

[329] ‘‘สกฺเก วิสฺสฏฺฐมตฺเต’’ติ ปาโฐ, อฏฺฐมสิกฺขาปเท วิสฺสฏฺฐมตฺโตวฯ

ปชฺโชตราชวตฺถุกถาวณฺณนา

[334] ภุญฺชิตุํ นิสินฺนสฺสาติ เอตฺถ ‘‘ธมฺมปเท ‘พหินคเร ทิสฺวา’ติ วุตฺตํ, ตสฺมา ทฺวีสุ ทิวเสสุ ทินฺนํ เตน เตสุ เอเกกํ คเหตฺวา ทฺวีสุ อฏฺฐกถาสุ วุตฺตนฺติ ยุชฺชตี’’ติ วทนฺติฯ

สมตฺติํสวิเรจนกถาวณฺณนา

[336] กพเฬ กพเฬติ เอตฺถ กิญฺจาปิ คุฬาทีสุ ปกฺขิตฺตํ, ตํ ปน ภควาว ปริภุญฺชิ, ตสฺมา นตฺถิ โทโสฯ

วรยาจนกถาวณฺณนา

[337] มหาปิฏฺฐิยโกชวํ นาม อติเรกจตุรงฺคุลปุปฺผํ กิรฯ

กมฺพลานุชานนาทิกถาวณฺณนา

[340] อุปจาเรติ สุสานสฺส อุปจาเรฯ พหิปิ วฏฺฏตีติ เอเกฯ กติกกรณํ ทสฺเสตฺวา ‘‘มยฺหํ สนฺตกํ ตว จ มม จ โหตูติ วตฺวา อิตเรน จ ตถาวุตฺเต วฏฺฏตี’’ติ สมานปริกฺขารวิธิํ วทนฺติฯ

[342] ‘‘ขณฺฑสีมายปิ สมฺมนฺนิตุํ วฏฺฏตีติ วุตฺตตฺตา เสสกมฺมานิปิ ตตฺถ นิสีทิตฺวา กาตุํ วฏฺฏตี’’ติ วุตฺตํฯ